Tre vjet më vonë dhe akoma e vështirë ta besojmë por Donald Trump po mbyll mandatin e tij të parë si President i USA.
Që nga dita e tij e parë deri më sot fjalia më e përdorur prej tij përveç “it’s gonna be huge” ka qenë padyshim “Fake News“.
Duke delegjitimuar këdo që flet kundër tij, Trump ia doli të krijojë një epokë destabiliteti në glob sa i përket medias dhe besimit në të. Megjithatë ky president pavarsisht deklaratave të tij të forta dhe sigurisë në secilën prej tyre, e vërteta është që faktet nuk janë fort të rëndësishme për të. Mjafton që ti leverdisë atij. Dhe kur atij nuk i leverdis mjerë ai që është në krahun e kundërt.
Ky skenar është përsëritur pikërisht ditën e djeshme, nën pretekstin e luftës për “Lirinë e Fjalës” Trump firmosi një urdhër i cili kërkon të përjashtohen rrjetet sociale nga mbrojtja e Seksionit 230.
Seksioni 230 i Communications Decency Act u jep platformave sociale autorizim të gjerë për të moderuar fjalën në platformat e tyre. Duke i përjashtur edhe nga përgjegjësitë që ato kanë ndaj deklaratave që përdoruesit bëjnë pasi rrjeti social nuk është burim por platformë e lajmit.
Megjithatë në 2016 pas skandaleve të njëpasnjëshme me Facebook u kërkua nga kompanitë e rrjeteve sociale që të gjenin një zgjidhje për të bërë të mundur verifikimin e asaj çka qarkullon në rrjet. Kjo është e vetmja luftë kundër Fake News.
Në rastin kur dyshohet që deklarata apo informacioni i shpërndarë në rrjet është i dyshimtë dhe i pabazë, postimit i vihet një shirit “fact checking” i cili vë në diskutim vërtetësinë e materialit.
Por çfarë ndodh kur ti Presidenti i Shteteve të Bashkuara akuzohesh për Fake News?
E pra përpara pak kohësh disa nga postimet e Trump janë sinjalizuar nga Twitter si të dyshimta, dhe besohet se kjo ka qenë edhe arsyeja e vërtetë që presidenca sulmon kompanitë e rrjeteve sociale. Nën pretendimin se ato po cënojnë fjalën e lirë dhe vendimet e tyre janë të politizuara ligji kërkohet të ndërrohet. Pra Fake News duhet ta luftojmë por nuk kemi të drejtë të vëme në dyshim qeverinë apo kreun e saj.
Gjithashtu Trump ka kërkuar të rishikohen fondet e dedikuara të qeverisë për marketingun në social media.
