Astronomët prej vitesh po kërkojnë prova të jetës dhe botëve të pazakonta përtej sistemit tonë diellor, duke zbuluar deri më sot rreth 6,000 ekzoplanete. Megjithatë, asnjë prej tyre nuk i ngjan PSR J2322-2650b, një planet unik që konsiderohet i vetmi ekzoplanet i ngjashëm me një “Jupiter të nxehtë” që orbiton rreth një pulsari – një yll neutronik që rrotullohet jashtëzakonisht shpejt.
Një nga veçoritë më të çuditshme të këtij planeti është forma e tij e pazakontë, e krahasuar me një limon. Kjo formë krijohet nga forcat ekstreme gravitacionale të pulsarit, të cilat e tërheqin dhe e deformojnë planetin ndërsa ai orbiton shumë afër tij. PSR J2322-2650b ndodhet vetëm rreth një milion milje larg pulsarit, një distancë jashtëzakonisht e vogël krahasuar me Tokën, e cila është rreth 100 milion milje larg Diellit. Kjo afërsi bën që planeti të goditet nga rrezatim shumë intensiv, duke e ndriçuar dhe ngrohur në mënyrë ekstreme.
Temperatura e PSR J2322-2650b varion nga rreth 650 deri në 2000 gradë Celsius, duke e bërë atë një mjedis jashtëzakonisht të nxehtë. Megjithatë, ajo që e dallon më shumë këtë ekzoplanet është përbërja e atmosferës së tij. Atmosfera dominohet nga heliumi dhe karboni molekular, një kombinim shumë i pazakontë për një planet me temperatura kaq të larta. Në kushte të tilla, pritet që karboni molekular të lidhet me atome të tjera, gjë që zakonisht nuk lejon zbulimin e tij në këtë formë.
Astronomët kanë analizuar përbërjen kimike të atmosferës së rreth 150 planetëve, si brenda ashtu edhe jashtë sistemit tonë diellor. Nga të gjithë këta, PSR J2322-2650b është i vetmi që ka karboni molekular të dallueshëm. Kjo veçori e çuditshme ka ngritur pikëpyetje të mëdha mbi mënyrën se si është formuar planeti, pasi duket se përjashton të gjitha mekanizmat e njohur të formimit planetar. Studimi që përshkruan këto zbulime është publikuar në Astrophysical Journal Letters.
