Të gjithë planetet në sistemin tonë diellor mund të shikohen gjatë natës në qiell gjatë këtyre kohëve, duke i ofruar vëzhguesve të yjeve një “show spektakolar” për këtë fundvit.
Përgjatë ditëve në vijim, do të jetë e mundur që të shikoni Mërkurin, Venusin, Marsin, Jupiterin dhe Saturnin me sy të lirë, ndërkohë që Urani dhe Neptuni mund të vëzhgohen nëpërmjet dylbive apo teleskopëve.
“Këto netë, ne mund të shikojmë të gjithë planetët e sistemit tonë diellor pas perëndimit,” tha Gianluca Masi, një astronom në Virtual Telescope Project. “Kjo gjë ndodh herë pas here, por gjithmonë është një pamje spektakolare.”
Duke filluar nga dita e sotme, hëna do t’i bashkohet këtij show, i cili mund të shikohet nga çdo vend në Tokë, në rast se qielli është i pastër. Duke nisur nga horizonti jug-perëndimor, planetët do të mund të shikohen me sy të lirë në renditjen: Venus, Mërkur, Saturn, Jupiter dhe Mars. Mërkuri do të jetë planeti më i vështirë për t’u shikuar.
Nëpërmjet dylbive apo teleskopit do të shikoni dhe Uranin, të lokalizuar midis Marsit dhe Jupiterit, si dhe Neptunin të lokalizuar midis Saturnit dhe Jupiterit.
“Parada Planetare” është një fenomen mjaft i bukur, por jo dhe aq i rrallë, pasi ndodh pothuajse çdo vit. Hera e fundit që planetët ishin të rreshtuar pas njëri-tjetrit ishte në qershor të këtij viti.
