Të gjithë do të dëshironim të kishim për vete një fanellë të përdorur nga futbollistët profesionistë të ekipit tonë të preferuar në ndeshje mjaft emocionuese e cila mban gjithashtu autografin e këtij futbollisti. Tashmë kjo gjë është bërë më e thjeshtë përmes ankandeve të organizuara nga MatchWornShirt.
Në këto ankande po ofrohen fanellat e veshura nga djemtë e kombëtares sonë në dy ndeshjet e para të grupeve të Euro 2024, të cilat u organizuan përballë Italisë dhe Kroacisë. Shqipëria arriti të futej në librin e rekordeve përmes Nedim Bajramit, i cili realizoi golin më të shpejtë në histori të këtij kampionati, pas vetëm 23 sekondash nga fillimi i ndeshjes kundër Italisë.
Kjo gjë ka bërë që njëkohësisht fanella e tij e veshur gjatë kësaj ndeshje të jetë më e kërkuara e çastit, dhe para pak ditësh u shit për vlerën prej €5,792. Kjo vlerë është momentalisht më e madhja e ofruar deri më tani për një fanellë të veshur në ndeshjet e Euro 2024.
Për sa i përket ndeshjes kundër Kroacisë, për momentin fanella me ofertën më të lartë (€520) është ajo e Klaus Gjasulës, i cili gëzoi në sekondat e fundit të ndeshjes të gjithë tifozët pavarësisht përplasjes së pafat që çoi në autogolin e shënuar.
MatchWornShirt sqaron se fitimet nga këto ankande të organizuara do të shkojnë drejt ekipit kombëtar të Shqipërisë, të cilat do të ndihmojnë në zhvillimin dhe rritjen e klubit apo në organizimin e projekteve të ndryshme.
