GameStop ka aksionet më të nxehta të momentit. Ai është një rrjet dyqanesh që shet disqe fizike video-lojrash, konsole e gjithçka tjetër rreth botës gaming. Të gjitha produkte që shiteshin shumë nga vitet 80 deri 2000. Por në 2021 mësuam që trendi është digjitalizimi, pra çfarë po e ben atë kaq të suksesshme sa të terbojë gjithë tregun e aksioneve?
Reddit. Për të qenë më të saktë një sub-reddit; r/WallStreetBets.
Ky grup me fillimish 3.2 milion ndjekës e sot 6.3 milion është një forum ku mblidhen njerëz që blejnë e shesin rregullisht në bursë. Dhe për një kohë të gjatë kanë bërë shaka, meme, me faktin se një ditë do të marrin përsipër aksionet e GameStop, kjo me tallje pasi kompania shihej si një humbje e sigurt, çmimet e saj kanë qenë tendencialisht gjithnjë në zbritje. Ka investitorë të cilët duke e shfrytëzuar rastin vinin bast vazhdimisht në trading se çmimi i saj do të ulej.
Duke zbatuar praktikën e “short selling” (shitje e shkurtër). Në bazë ajo lejon që ti të marrësh hua një aksion nga një broker, duke shpresuar se çmimi i saj do të ulet, e shet në çmimin aktual dhe e blen më pas për më pak sepse sidoqoftë duhet të kthesh aksionin që ke borxh. Psh. aksioni XYZ është $10, ti e merr hua dhe e shet, pret që të bjerë dhe e riblen për $7 dollarë, kthen aksionin mbrapa dhe fiton diferencën, pra $3 dollarë. Por ama nëse aksionit i rritet çmimi humbjet e tua janë të pafundme.
Ajo që ka ndodhur konkretisht është se një fond i mbrojtur, nje grupim me shumë mundësi nga Wall Street, mori hua në sasi të mëdha aksione GameStop, duke shpresuar që çmimi do të shkonte për poshtë.
Dikur shakaja pushoi së qeni një shaka, dhe grupi i WallStreetBets filloi të bëjë thirrje komunitetit të vetë që të blejë, duke e çuar kështu vlerën në bursë të kompanisë në stratosferë. Deri në $413 ka arritur vlera e një aksioni, krahasuar me $20 perpara 2 javëve. Dhe askush nuk ka ndërmend të shesë, duke e rritur çmimin vazhdimisht. Nga ana tjetër fondi i mbrojur duhet sidoqoftë të kthejë aksionet e marra hua, të cilat kanë arritur çmime të çmendura, por duke blerë edhe ata vetë shkaktojnë që çmimi të vazhdojë të rritet edhe më shumë, kjo quhet “Short Squeeze“.
Në fjalë të thjeshta populli i thjeshtë ka kapur një copë të majme parash, mbi $70 bilion në vlerë, dhe ka ndërmend në formë revolte për të mos hequr dorë derisa një aksion të arrijë vlerën $1000.
Por krahu humbës, Wall Street dhe bilionerët, 1% i popullatës që ka dekada që pasurohet nga këto skema është në krahun e humbësve në këtë rast dhe thotë se ky lloj grumbullimi i popullit është i jashtligjshëm. E për këtë nuk po rri duarkryq.
Duke shfrytëzuar aplikacione të thjeshta si RobinHood redditorët kanë bërë kërdinë. Në turma të organizuara kanë vënë bast për rritjen e tij, kjo platformë njëherë e një kohë ishte në krahun e popullit duke mundësuar aktivitet pa komisione. Por sot gjerat ndryshojnë.
Aplikacioni është vënë përpara një trysnie të fuqishme, dhe duke u justifikuar se thjesht është duke mbrojtur interesin e kompanisë së vetë dhe klientëve të saj e ka ndaluar disa herë. Por nëse ka diçka që nuk të duhet kundra në 2021 është interneti. Në turma të organizuara redditorët kanë shkruar review të këqija për të duke i prishur punë shumë më keq se ekonomikisht RobinHood-it. Dhe të acaruar më shumë se kurrë janë futur në platforma të tjera e kanë vazhduar të blejnë.
Aktualisht një aksion i GameStop vlerësohet me $321, blerja është ndaluar përkohësisht. Redditorët thonë se nuk kanë ndërmend të shesin. Borxhi i të pasurve parashikohet të arrijë kulme. Pra ndodhemi përpara krizës ekonomike të radhës. Politika dhe opozita ka filluar të mbajë krahë, Elon Musk ka dalë publikisht pro popullit duke thënë se aktiviteti duhet të vahzdojë, tek e fundit është brenda rregullave. Instancat qeveritare janë në alert, sepse shpërthimi nuk është larg.
Morali: mos e nënvlerëso kurrë fuqinë e një meme.
