Botërori për Klube i FIFA-s, i zgjeruar në format të ri, do të zhvillohet në Shtetet e Bashkuara nga 15 qershori – 13 korrik 2025 dhe do të transmetohet live ekskluzivisht në DigitAlb. Ndryshe nga formati i mëparshëm që mbahej çdo vit me vetëm 7 ekipe, tani do të marrin pjesë 32 ekipe dhe turneu do të organizohet çdo 4 vjet.
Kualifikimi dhe Ekipet Pjesëmarrëse
Skuadrat pjesëmarrëse janë përzgjedhur sipas performancave të tyre në garat kontinentale gjatë katër sezoneve të fundit. UEFA përfaqësohet me 12 klube – numri më i madh mes konfederatave. Vetëm 2 klube për shtet mund të marrin pjesë. Nga Azia, Afrika dhe Amerika e Veriut e Qendrore janë përzgjedhur nga 4 klube për secilën zonë, Amerika e Jugut përfaqësohet me 6 ekipe, ndërsa Oqeania me 1. Një vend i është dhënë Inter Miami nga SHBA, si fitues të “Supporters’ Shield” në MLS, vendim që shumë e shohin si përpjekje për të përfshirë Lionel Messin në turne.
Shorti dhe Formati i Garës
Turneu ndahet në 8 grupe me nga 4 skuadra. Çdo ekip do të luajë një herë me secilin rival të grupit. 2 të parët e çdo grupi kalojnë në fazën me eliminim direkt. Nuk do të ketë ndeshje për vendin e tretë. Finalja zhvillohet më 13 korrik në New Jersey. Në ndeshjen e fundit kualifikuese të zhvilluar mes LAFC dhe Club America, LAFC triumfoi me rezultatin 2-1 duke siguruar kështu një vend në Botërorin e Klubeve në grupin D. Më poshtë do të shikoni ndarjen në grupe të ekipeve pjesëmarrëse.
Shpërblimet financiare
FIFA ka vendosur një fond shpërblimesh prej 905 milionë euro. Fituesi mund të marrë deri në 113 milionë euro. Fitoret në fazën e grupeve sjellin 1.76 milionë euro, barazimet 936 mijë euro. Faza me eliminim ofron më shumë: 6.8 milionë në 1/16, 11.8 milionë në çerekfinale, 19 milionë në gjysmëfinale, 27.2 milionë për finalistin dhe 35 milionë për fituesin. Klubet evropiane do të përfitojnë më shumë se ato nga kontinentet e tjera – deri në 35 milionë euro për ekipet më të vlerësuara.
Qytetet dhe stadiumet pritëse
Ndeshjet do të zhvillohen në 12 stadiume në SHBA, përfshirë Hard Rock Stadium në Miami dhe Rose Bowl në Los Angeles. Ndeshja hapëse do të luhet në Miami dhe finalja në MetLife Stadium, New Jersey. Turneu do të shërbejë si një provë përpara Kupës së Botës 2026, që do të organizohet nga SHBA, Kanada dhe Meksika.
Polemikat
FIFA është kritikuar nga sindikata e lojtarëve Fifpro dhe nga ligat elitare evropiane për mbingarkesën në kalendar dhe rrezikun për shëndetin e lojtarëve. Vetëm 5 javë ndajnë finalen e këtij turneu me nisjen e Premier League më 16 gusht.
Një tjetër shqetësim është se Kupa e Botës për Klube do të mbivendoset pjesërisht me Euro 2025 për femra (2-27 korrik). Disa janë të shqetësuar se kjo mund të ndikojë në vëmendjen që merr turneu i femrave. Megjithatë, oraret e zhvillimit të ndeshjeve në dy kompeticionet do të jenë të ndryshme për shkak të zonave kohore të ndryshme.
Mos humb Botërorin e Klubeve nga 15 qershori në 13 korrik 2025, ekskluzivisht në DigitAlb
