Shumë fëmijë presin me padurim dhuratat e festave të fundvitit që Babagjyshi do t’i sjellë në shtëpitë e tyre. Megjithatë, Babagjyshi do të duhet të punojë shumë fort dhe me një shpejtësi marramendëse për t’i dorëzuar dhuratat 2 miliardë fëmijëve në planet.
Shkencëtarët kanë llogaritur se Babagjyshi do t’i duhet të udhëtojë 144 milionë kilometra për të dorëzuar dhuratat për të gjitha vajzat dhe djemtë e mirë anembanë botës. Kjo është e barabartë me fluturimin me slitë të tij nga Toka në Diell në një natë të vetme.
Duke llogaritur dhe pak kohë për dorëzimin e këtyre dhuratave në shumë banesa të ndryshme, Babagjyshi do të duhet të udhëtojë me 8.2 milionë km/orë, ose 0.8% të shpejtësisë së dritës. Sipas teorisë së relativitetit special të Albert Ajnshtajnit, objektet që udhëtojnë me slitën e Babagjyshit do të kompresohen në përmasa ndërsa arrijnë përfaërsisht shpejtësinë e dritës. Por më e çuditshmja nga të gjitha, shkencëtarët thonë se, me këtë shpejtësi, hunda e famshme e Rudolfit nuk do të dukej fare e kuqe.
Dr Laura Nicole Driessen, një astronome nga Universiteti i Sidneit, i bëri këto llogaritje festive bazuar në një formulë të krijuar nga fizikanët e grimcave nga Fermilab në vitet 1980.
Me rreth 2.3 fëmijë për familje në mbarë botën, Babagjyshi do të duhet të ndalojë në të paktën 300 milionë shtëpi. “Babagjyshi duhet të përshkojë 144 milionë kilometra në prag të festave. Kjo është pothuajse e njëjtë me distancën nga Toka në Diell.’
Kjo do të ishte një detyrë shumë e gjatë nëse do të kryhej brenda vetëm 10 orëve midis orës 20:00 dhe 06:00 të mëngjesit tjetër kur fëmijët të jenë duke fjetur. Fatmirësisht, ai fiton disa orë shtesë falë rrotullimit të Tokës. Nëse fëmijët shpërndahen në mënyrë të barabartë në mbarë globin, atëherë ai ka të paktën 24 orë për të udhëtuar në të gjithë planetin. Dhe, me ndryshimin prej 11 orësh në zonat kohore midis njërës anë të botës dhe tjetrës, Babagjyshi ka gjithsej 35 orë nga fëmija i parë që bie në gjumë deri në zgjimin e fundit.
