Studio arkitekturore portugeze OODA fitoi konkursin ndërkombëtar për zyrat e reja të TV Klan në Tiranë. E vendosur në një hapësirë 10,000 m2 pranë autostradës në Farkë – një zonë me zhvillim të shpejtë – arkitektura e propozuar synon të bëhet një pikë e re referimi në Tiranë dhe një pjesë integrale e peizazhit.
Struktura frymëzohet nga bobinat e filmave, që në këtë rast janë të mbivendosura, ndërkohë që përfshin elementë të arkitekturës vendase dhe ofron një pamje 360⁰ përreth zonës.
Këto “bobina filmi” të mbivendosura njëra mbi tjetrën do të përfaqësojnë çdo kat paksa të dalë në drejtime të ndryshme nga qendra e ndërtesës. Zhvendosja e çdo kati formon disa zona që dalin jashtë bazës së ndërtesës, duke i dhënë asaj një pamje të veçantë. Nga brenda, forma dhe perspektiva të reja shpalosen ndërsa vizitorët lëvizin rreth strukturës, ndërsa panorama gjithëpërfshirëse e maleve dhe qytetit plotësojnë hapësirat përreth.
Çdo nivel i kësaj ndërtese të re do të ndriçohet nga drita e diellit, duke i lejuar personat që punojnë në këtë ambient të shijojnë pamjet mahnitëse. Ndërtesa është e organizuar në tetë kate, me pesë zona programatike që shpalosen rreth hapësirës në zonën e hollit.
Drita natyrale përshkon çatinë falë prerjes rrethore dhe përshkon të gjitha katet duke ndriçuar dhe hollin me një hapësirë mjaft të madhe. Kjo hapësirë me ndriçim natyral promovon gjithashtu ndërveprimin social dhe komunikimin midis kolegëve që ndodhen në niveleve të ndryshme.
Përveç aspektit viziv, prerja rrethore shfrytëzon energjinë diellore për ndriçimin natyral dhe ngrohjen e godinës së TV Klan. Gjithashtu OODA ka dizenjuar një sistem për grumbullimin e shiut që më vonë do të përdoret për ujitjen e bimëve përreth.
Fasada është ndërtuar me profile xhami të harkuar për të shijuar në maksimum pamjen përreth ndërtesës.
