Drejtuesi i Financial Conduct Authority në Mbretërinë e Bashkuar, Charles Randell, ka kritikuar reklamimin e kriptomonedhës së patestuar më parë nga ana e Kim Kardashian, e cila përmes një story në Instagram kërkoi nga 250 milionë ndjekësat e saj t’i bashkohen komunitetit të Ethereum Max.
“Influencer-at në Instagram shpesh herë paguhen nga mashtruesit për t’i ndihmuar ato në grumbullimin e monedhave të reja në mënyrë mjaft të dyshimtë. Unë nuk mund të them nëse Etherum Max, që u reklamua nga Kim Kardashian, është një mashtrim për sa kohë ajo nuk është testuar mirë.” tha Randell.
Ai shtoi gjithashtu se ky mund të ketë qenë promocioni financiar që ka kapur interesin më të madh të audiencës në histori.
Aktualisht rreth 2.3 milionë qytetarë në Mbretërinë e Bashkuar posedojnë kriptomonedha, dhe 14% e tyre i kanë blerë ato, duke rritur riskun e humbjes së parave.
Charles Randell tha se FCA ka lajmëruar qytetaret shpesh herë rreth rreziqeve të mbajtjes së monedhave të dyshimta, të cilat nuk janë të rregulluara nga FCA ose nuk janë të mbuluara nga një skemë kompensimi. “Nëse ju i bleni këto kriptomonedha, përgatituni sepse mund t’i humbni ato.”
