Mjekët në SHBA kanë raportuar rastin më të gjatë të njohur deri tani të infektimit me COVID-19, që zgjati plot 776 ditë përpara se pacienti të ndërronte jetë. Bëhet fjalë për një 41-vjeçar me HIV, rast që tregon se si një sistem imunitar i dobësuar lejon koronavirusin të qëndrojë dhe të pësojë mutacione të rralla tek njerëzit e shëndetshëm.
Sipas studiuesve të Universitetit të Bostonit, pacienti filloi të shfaqte simptoma në maj 2020, pas kontakti me një rast të konfirmuar me COVID-19, por u diagnostikua zyrtarisht vetëm në shtator, kur gjendja iu përkeqësua dhe u shtrua në spital. Ai ishte diagnostikuar me HIV/AIDS që në vitin 2002, por nuk merrte rregullisht terapinë antiretrovirale, duke lënë sistemin imunitar shumë të dobët për të luftuar virusin.
Gjatë më shumë se dy vitesh, virusi brenda trupit të tij zhvilloi një sërë mutacionesh, disa të ngjashme me ato që u panë më vonë te variantet kryesore si Omicron. Megjithatë, këto ndryshime duket se nuk u përhapën te të tjerët, pasi ishin përshtatur posaçërisht me mjedisin e tij imunitar. Testet PCR rezultuan vazhdimisht pozitive deri dy ditë para vdekjes, e cila nuk lidhet drejtpërdrejt me infeksionin.
Raste të tilla ekstreme janë raportuar edhe më parë: në 2024, mjekët në Holandë përshkruan një pacient imunokompromentuar që mbeti i infektuar për 613 ditë, ndërsa në 2022 në Londër u regjistrua një infeksion 505-ditor.
Ndërsa tek shumica e njerëzve të shëndetshëm COVID-19 largohet brenda pak javësh, këto raste tregojnë rrezikun e madh që virusi paraqet për ata me imunitet të dobët. Studiuesit theksojnë se infeksione kaq të zgjatura mund të nxisin shfaqjen e varianteve të reja, duke e bërë të domosdoshme mbikëqyrjen globale edhe pse pandemia konsiderohet e mbyllur. Studimi i plotë është botuar në The Lancet: Microbe.
