Me sa duket ne shqiptarët kemi shumë qejf të paguajmë për gjithçka me para në dorë, dhe një gjë e tillë është vërtetuar dhe nga një raport i Bankës Botërore për sa i përket pagesave dixhitale në rajonin e Ballkanit Perëndimor.
Në vitin 2017, vetëm 29% e popullsisë mbi 15 vjeç kryente pagesa dixhitale, ndërkohë që kjo përqindje u rrit në vitin 2021 në 35%, megjithatë Shqipëria mbetet sërisht më e prapambetura në këtë drejtim. Vendet e tjera në Ballkanin Perëndimor kanë bërë më mirë në këtë renditje.
Në vitin 2017 në Kosovë ishin 39% e popullsisë mbi 15 vjeç që paguanin në mënyrë dixhitale, dhe në vitin 2021 përqindja u rrit deri në 48%. Ne Bosnjë, 67% e popullsisë mbi 15 vjeç përdorën pagesa dixhitale në vitin 2021, në Maqedoninë e Veriut 74%, dhe në Serbi 87%.
Pagesat dixhitale jo vetëm që janë të shpejta, por bëjnë të mundur që bizneset të operojnë në mënyrë më të sigurtë si dhe të jenë transparente për sa i përket shitjeve, duke reduktuar informalitetin. Është vërtetuar se një rritje me 10% në numrin e pagesave dixhitale do të ulë informalitetin me 2%.
