Pjesëmarrësit në Squid Game: The Challenge po kërcënojnë se do të ndërmarrin veprime ligjore kundër Netflix dhe producentëve pasi pretenduan se u dëmtuan fizikisht gjatë xhirimeve të këtij reality-show. Një firmë ligjore britanike për lëndime personale po përfaqëson dy lojtarë të paidentifikuar, të cilët thonë se pësuan hipotermi dhe dëmtime nervore ndërsa filmi po xhirohej në kushte të ftohta në Mbretërinë e Bashkuar.
Pretendimet e pjesëmarrësve kanë të bëjnë me përvojën e tyre në xhirimin e lojës hapëse të shfaqjes “Red Light, Green Light“, në të cilën lojtarët duhet t’i shmangen vëmendjes së një kukulle kërcënuese robotike. Loja u filmua në Cardington Studios, një ish bazë e Forcave Ajrore Mbretërore në Bedford, gjatë një periudhe mjaft të ftohtë në Britani. Netflix konfirmoi në atë kohë se tre nga 456 lojtarët kërkuan kujdes mjekësor.
Express Solicitors, e cila është e specializuar në këtë drejtim, tha se klientët e saj rrezikuan shëndetin e tyre duke u detyruar të qëndronin të palëvizshëm për periudha të gjata gjatë xhirimeve, ndërsa përpiqeshin të qëndronin në garë. CEO i kësaj kompanie, Daniel Slade u shpreh: “Konkurrentët mendonin se po merrnin pjesë në diçka argëtuese dhe të dëmtuarit nuk prisnin të vuanin siç vuajtën. Tani ata kanë mbetur me lëndime pasi kaluan kohë duke qëndruar në pozicione të dhimbshme në temperatura të ftohta.”
Megjithatë një zëdhënës i Squid Game: The Challenge tha: “Asnjë padi nuk është ngritur nga asnjë prej garuesve të Squid Game. Ne e marrim shumë seriozisht mirëqenien e garuesve tanë.”
