Për të gjithë ata që nuk e panë superhënën nga moti i keq, këto janë datat kur ky fenomen do të përsëritet

Dhe pse shumë nga ju ishin përgatitur për të parë një Hënë super të madhe në datën 19 gusht, kushtet jo të mira atmosferike e bënë tepër të vështirë shijimin e kësaj pamje. Megjithatë mos u shqetësoni, pasi ky ishte 1 nga 4 superhënat që do të jenë të dukshme gjatë këtij viti.

Një superhënë si ajo e datës 19 gusht ndodh kur Hëna arrin 90% të distancës së saj më të afërt me Tokën. Për fat të mirë, këto ngjarje do të ndodhin disa herë, kështu që do të ketë disa mundësi të reja për të shijuar superhënën deri në nëntor.

Meqenëse orbita e Hënës rreth Tokës nuk është saktësisht rrethore, distanca midis dy trupave qiellorë ndryshon gjatë gjithë vitit. Normalisht, hëna mbetet rreth 384,000 km larg, por gjatë një superhëne kjo distancë zvogëlohet ndjeshëm.

Dr Edward Bloomer, menaxher i lartë i astronomisë në Observatorin Mbretëror të Greenwich, tha: “Për shkak të ndryshimit të distancës Tokë-Hënë, Hëna mund të duket pak më e madhe ose më e vogël nga këndvështrimi i një vëzhguesi në Tokë.”

Gjatë superhënës së djeshme, hëna ishte 23,000 km më afër se normalja, një ndryshim ekuivalent me pothuajse dyfishin e diametrit të Tokës. Ky ndryshim bën që Hëna të duket 30% më e ndritshme dhe 14% më e madhe për një vëzhgues në Tokë.

Këto janë datat që duhet të fiksoni në kalendarin tuaj nëse e shijoni me të vërtetë pamjen e superhënës: 17 shtator, 17 tetor dhe 15 nëntor 2024. Superhëna e tetorit do të jetë më e madhja e vitit, pasi do të jetë në pikën më të afërt me Tokën. Megjithatë superhëna e shtatorit do të jetë më spektakolarja, pasi mund të shoqërohet me një eklips të pjesshëm hënor.