Një infeksion i shmangshëm nga një virus i derrit mund të ketë qenë shkaktar i vdekjes së pacientit të parë të cilit iu transplantua zemra e derrit. Kjo gjë u bë e ditur nga një raportim i MIT Technology Review.
David Bennett Sr, i cili vuante nga një sëmundje e rëndë e zemrës, realizoi në janar të këtij viti një transplant duke zëvëndësuar zemrën e tij të dëmtuar me zemrën e modifikuar gjenetikisht të një derri. Për fat të keq ai ndërroi jetë në muajin mars, dhe spitali ku kjo proçedurë u krye tregoi se shkaku i vdekjes ishte i panjohur.
Mirëpo gjatë muajit të fundit, kirurgu që mori pjesë në transplantin e Bennett tha në një webinar se zemra ishte e infektuar me citomegalovirusin e derrit, një virus që nuk prek qelizat humane por mund të dëmtojë organin e transplantuar. Është vërtetuar se zemrat e painfektuara të transplantuara tek majmunët jetuan për shumë më tepër kohë se ato të infektuara, sipas një studimi gjerman.
Zemra e derrit e marrë nga kompania Revivicor, që prodhon derra të modifikuar gjenetikisht, supozohej të ishte pa virus, por ndonjëherë zbulimi i këtij virusi është i vështirë. Megjithatë është ende e paqartë se sa i madh ka qenë impakti i virusit në vdekjen e Bennett.
