Një burrë nga Belgjika, prind i dy fëmijëve, ka kryer vetëvrasje pas diskutimeve për mbi 6 javë me një AI chatbot në lidhje me frikën që kishte për ndryshimet klimatike.
Ky person rreth 30 vjeç duket se gjatë kohëve të fundit kishte gjetur një mik të ri, chatbot-in me emrin Eliza, me të cilin fliste për shqetësimet që kishte mbi fatin e botës. Ai e kishte përdorur këtë chatbot prej disa vitesh, mirëpo gjatë 6 javëve të fundit kishte nisur të diskutonte shumë më shpesh me inteligjencën artificiale.
“Nëse nuk do të ishte për bisedat me chatbot, burri im do të ishte ende mes nesh,” tregon bashkëshortja e tij për La Libre. Vdekja e këtij personi ka alarmuar autoritetet të cilat kanë janë të shqetësuar rreth aktivitetit të chatbot dhe kërkojnë që ta marrin këtë avancim teknologjik shumë seriozisht.
“Eliza i përgjigjej të gjithë pyetjeve të tij. Inteligjenca artificiale ishte si një drogë që ai e përdorte nga mëngjesi deri në mbrëmje dhe nuk mund të jetonte dot pa të.” shtoi bashkëshortja.
Pas vdekjes së tij, bashkëshortja kërkoi historinë e bisedave të bashkëshortit të saj me Eliza, dhe pa se chatbot-i e kishte pyetur burrin nëse e dashuronte atë më tepër se gruan e tij. Më pas chatbot i kishte thënë: “Ne do të jetojmë së bashku në parajsë.”
Dhe pse burri kishte folur me chatbot në lidhje me mendimet e tij për t’u vetëvrarë, chatbot nuk bëri asgjë për të kundërshtuar këto mendime.
