Elon Musk pushoi nga puna një inxhinier mjaft të aftë në Twitter pasi ai i tha se popullariteti i tij në kompani po binte. Kjo gjë u bë e ditur nga një raportim i Platformer.
Musk takoi disa inxhinierë të ndryshëm të kompanisë gjatë ditës së martë për të diskutuar në lidhje me numrin e shikueshmërisë së tij në Twitter, e cila ka pësuar një goditje të madhe gjatë kohëve të fundit. Miliarderi më parë i kishte kërkuar punonjësve të shikonin nëse adresa e tij kishte një shikueshmëri të kufizuar për shkak të një problemi me algoritmin.
“Kjo është qesharake,” i tha Musk punonjësve. “Unë kam më tepër se 100 milionë ndjekës, dhe për momentin po marr vetëm disa dhjetëra mijra shikime në tweet-et e mia.”
Më pas punonjësit e Twitter i treguan Musk të dhënat e brendshme të kompanisë si dhe një grafik në Google që tregonte se interesi i publikut për Musk kishte rënë gjatë kohëve të fundit. Të dhënat e Google Trends tregojnë se interesi për Elon Musk ishte në 100 pikë në momentin e blerjes së Twitter, ndërkohë që momentalisht vlerësohej me 9 pikë.
Kur një inxhinier i tha CEO-s se popullariteti i tij mund të jetë në rënie për shkak të mungesës së interesit të publikut pas blerjes së Twitter, Musk e pushoi menjëherë nga puna.
