Formula 1 është përfshirë nga një valë spekulimesh se kampioni në fuqi Max Verstappen mund t’i bashkohet Mercedes për sezonin e ardhshëm, pas një karriere të gjatë e të suksesshme me Red Bull. Këto zëra kanë marrë hov pas dy ngjarjeve paralele: shkarkimit befasues të Christian Horner si shef ekzekutiv i Red Bull Racing dhe sinjalizimet e tifozëve që kanë ndjekur lëvizjen e avionit privat të Verstappen.
Verstappen, i cili iu bashkua Red Bull Junior Team në 2014 dhe debutoi me skuadrën kryesore pas dy vjetësh, është bërë piloti më i ri që ka fituar një Grand Prix në historinë e Formula 1, në moshën 18 vjeç e 228 ditë. Që atëherë, ai ka korrur suksese të jashtëzakonshme, duke fituar kampionatin tri herë radhazi dhe duke u bërë fytyra kryesore e skuadrës austro-britanike.
Megjithatë, situata në Red Bull u trondit në fillim të muajit kur kompania lajmëroi largimin e papritur të Christian Horner pas 20 vjetësh drejtim. “Red Bull ka liruar Christian Horner nga detyrat operacionale me efekt të menjëhershëm dhe ka emëruar Laurent Mekies si CEO i Red Bull Racing,” njoftoi kompania më 9 korrik 2025. Për këtë arsye, tifozët dhe analistët nisën të spekulojnë mbi të ardhmen e Verstappen, duke marrë këtë lajm si një moment kyç në marrëdhëniet e pilotit me skuadrën.
Për më tepër, dy javë më parë, ish-piloti i F1 Ralf Schumacher bëri të ditur se dy jahte, njëri në pronësi të Verstappen dhe tjetri i kreut të Mercedes, Toto Wolff, ishin parë pranë bregdetit të Sardinias, duke sugjeruar një takim mes tyre. Së fundmi, fansat postuan në Reddit të dhëna nga FlightRadar që tregojnë lëvizjet e avionit privat të Verstappen në të njëjtën zonë dhe në të njëjtën kohë me praninë e Wolff, çka ka ndezur edhe më shumë imagjinatën e komunitetit.
Nga ana e tij, Toto Wolff ka pranuar në një intervistë për Sky Sports se është i interesuar të nënshkruajë me Verstappen, edhe pse kontrata aktuale e tyre me Red Bull shtrihet deri në 2028. “Unë jam gjithmonë i hapur dhe i kujdesshëm në përpjekjet tona për të ndërtuar një skuadër të fortë,” tha Wolff, duke theksuar se bisedimet janë transparente dhe se George Russell, piloti aktual i Mercedes, është i informuar për situatën. Ai sqaroi se megjithëse janë në diskutim ide afatgjate, asgjë nuk është vendosur ende dhe se është shumë herët për të deklaruar se “do të nënshkruajnë me Verstappen”.
Këto fakte kanë mbajtur flakën e zërave të transferimit të Verstappenit gjallë brenda Formula 1. Ndërkohë që disa fansa presin një veprim befasues nga Mercedes, të tjerë mbeten skeptikë, duke iu referuar gjendjes së kontratës së pilotit me Red Bull.
