Pronarët e Formula 1 kanë refuzuar një ofertë mjaft të majme të bërë nga Arabia Saudite për të blerë këtë sport, pasi insistonin se Formula 1 nuk është në shitje.
Liberty Media bleu F1 për $4.4 miliardë në vitin 2017 mirëpo popullariteti i F1 është rritur ndjeshëm që nga ajo kohë, duke e çuar vlerën e sportit në $15.2 miliardë. Ekziston një interes mjaft i madh nga Arabia Saudite për të zhvilluar një garë në këtë vend si dhe të zotërojë një ekip në F1, mirëpo raportimet e fundit treguan se gjatë kohëve të fundit ishte bërë dhe një ofertë për të blerë tërësisht F1.
Liberty Media tregoi se një ofertë e tillë ishte bërë në vitin 2020 por u refuzua që në fazat e para pasi Formula 1 nuk ishte në shitje, dhe pse nga Arabia Saudite erdhi një ofertë shumë e majme prej mbi $20 miliardë.
Fondi publik i investimeve të Arabisë Saudite ka zgjeruar influencën në sporte gjatë viteve të fundit, ku kreu dhe blerjen e ekipit Newcastle që luan në Premier League. Arabia Saudite i bëri gjithashtu një ofertë të parezistueshme Cristiano Ronaldo-s prej $200 milionë në vit për të luajtur në ekipin e Al-Nassr.
