Dhe pse janë të zhdukura prej një periudhe kohe shumë të madhe, dinosuarët ngjallin akoma interes në ditët e sotme. Tashmë personat e apasionuar pas dinosaurëve kanë mundësinë të zotërojnë skeletin më të madh në botë – një Apatosaurus të quajtur Vulcain.
Kjo specie bimëngrënëse, emri i së cilës në greqisht do të thotë ‘hardhucë mashtruese’, arriti gjatësinë 21 metra dhe jetonte në një zonë që tani është Amerika e Veriut. Ata janë të lidhur ngushtë me Brontosaurusin e famshëm dhe mendohet se kanë qenë një nga kafshët më të mëdha tokësore të të gjitha kohërave. Ata kishin një bisht të gjatë e të ngushtë që mund ta përdornin si kamxhik kundër grabitqarëve, ose për të siguruar ekuilibër kur ecnin.
Ai ishte gjigand- peshonte sa pesë elefantë të rritur – dhe jetonte në tufa. Një shtëpi ankandi në Paris është përzgjedhur për të shitur ekzemplarin më 16 nëntor dhe pritet të arrijë deri në $5.33 milionë. Kushdo që blen dinozaurin do të marrë gjithashtu detajet e GPS se ku u zbulua dhe planin e gërmimit.
Skeleti i të rriturve është më shumë se 80% i kompletuar dhe është rreth 150 milionë vjet i vjetër. Zbulimi u bë në Wyoming në SHBA në vitin 2018 dhe zgjati 3 vjet për t’u gërmuar.
Deri në momentin e shitjes në ankand, ai do të jetë në ekspozitë publike në Domaine de Dampierre-en-Yvelines – një vilë dhe park 45 minuta jashtë Parisit.
