Në listën e pasaportave më të fuqishme vit pas viti vihen re ndryshime, dhe këtë vit Singapori është tashmë i vetëm në vendin e parë si pasaporta më e fuqishme në botë. Nëse ju keni një pasaportë të tillë, mund të vizitoni 195 nga 227 destinacione në të gjithë botën pa viza, sipas Hennley Passport Index.
Vitin e kaluar kujtojmë se vendi i parë në këtë kategori ndahej nga disa shtete njëkohësisht, si Singapori, Italia, Franca, Spanja, Gjermania dhe Japonia.
Këtë vit Japonia është e dyta në renditje, me një derë të hapur për 193 destinacione, pasi ka siguruar medaljen e argjendtë duke rifituar aksesin pa viza në Kinën fqinje për herë të parë që nga bllokimet e Covid-19.
Shtetet anëtare të BE-së, Franca, Gjermania, Italia dhe Spanja janë në vendin e tretë, së bashku me Finlandën dhe Korenë e Jugut, me akses në 192 destinacione pa nevojë për vizë paraprake.
Pozicioni i katërt në renditje është një dëshmi e fuqisë së zonës Shengen pa kufij të Bashkimit Evropian, e cila garanton lëvizjen e lirë për më shumë se 425 milionë qytetarë të BE-së. Ai mbahet nga 7 vende të BE-së, secila me akses pa viza në 191 destinacione: Austri, Danimarkë, Irlandë, Luksemburg, Holandë, Norvegji dhe Suedi.
Në anën e kundërt të renditjes, në vendin e 106, Afganistani mbetet në vendin e fundit, me akses pa viza në vetëm 26 destinacione, dy më pak se një vit më parë. Siria është në vendin e 105 (me 27 destinacione) dhe Iraku është në vendin e 104 (me 31 destinacione).
Po pasaportat e Shqipërisë dhe Kosovës?
Sipas Henley Passport Index, pasaporta shqiptare renditet në vendin e 43, me qytetarët që mund të lëvizin lirshëm drejt 123 destinacione. Krahasuar me vitin e kaluar, pasaporta shqiptare është përmirësuar me 4 vende në renditje, ndërkohë që numri i destinacioneve që mund të vizitohen pa visa mbetet i njejtë.
Pasaporta kosovare renditet në vendin e 68 duke i mundësuar lëvizje të lirë qytetarëve drejt 80 destinacioneve. Ky është një përmirësim nga një vit më parë, ku Kosova renditej në vendin e 68 me vetëm 74 destinacione që qytetarët mund të vizitojnë pa një vizë.
