Ndryshimet klimatike mund të ndryshojnë rrënjësisht eksperiencën e të jetuarit në disa qytete, siç bëhet e ditur nga publikimi i një harte të re interaktive.
Harta, e zhvilluar nga shkencëtarët në Universitetin e Maryland, tregon mënyrat e tmerrshme se si do të ndryshojë klima në qytetin tuaj në 60 vitet e ardhshme. Nga Nju Jorku dhe Uashingtoni, deri në Shangai dhe Tokio, rezultatet zbulojnë se shumica e qyteteve së shpejti do të ndihen sikur janë afruar me ekuatorin. Disa nga zhvendosjet më të mëdha do të ndodhin në zonat veriore si Edmonton, Kanada, të cilat do të shohin rritje të temperaturës prej 7.1°C – duke e bërë atë të ndihet si Kansas.
Në mënyrë shqetësuese, disa rajone parashikohet të përjetojnë kushte klimatike më ekstreme se çdo gjë që është parë ndonjëherë në Tokë.
Harta interaktive përdor të dhënat nga Paneli Ndërqeveritar për Ndryshimet Klimatike (IPCC) për të llogaritur se si do të ndryshojë klima për 40,580 vende në mbarë botën. Për momentin në këtë hartë gjejmë të dhëna për 2 qytete në Shqipëri, Tiranën dhe Durrësin.
Për sa kohë të vazhdojnë emetimet e larta, vera në Tiranë, Shqipëri pritet të jetë 6.9°C më e ngrohtë dhe 16.1% më e thatë. Dimrat pritet të jenë 4°C më të ngrohtë dhe 6,5% më të thatë.
Për sa i përket qytetit të Durrësit, vera pritet të jetë 7,1°C më e ngrohtë dhe 12,6% më e thatë. Dimrat pritet të jenë 4,3°C më të ngrohtë dhe 7,2% më të thatë.
