Rregullatorët italianë kanë nisur hetimet pasi dyshojnë për fiksimin e çmimeve të biletave të fluturimit drejt Siçilisë nga linjat ajrore si RyanAir, Wizz Air dhe easyJet.
Ky investigim nisi pas ankesave të bëra nga grupi Codacons, ku tregohej një “dëshirë e fshehtë specifike” për të rritur çmimin e biletave të fluturimit nga dhe drejt Siçilisë gjatë festave të Krishtlindjeve, siç bëhet e ditur nga vetë rregullatorët. Në listën e kompanive ajrore që akuzohen është dhe kompania nën pronësinë e shtetit Italian, ITA Airways.
Megjithatë, nëpërmjet një deklarate për Reuters easyJet dhe Wizz Air i kanë mohuar këto akuza. “EasyJet i mohon fortësisht këto akuza, i përmbahet rregullave dhe ligjeve dhe pranon të bashkëpunojë plotësisht me autoritetet për të demonstruar se kompania ka punuar gjithmonë sipas ligjit në interesat më të mirë të klientëve.” tha zëdhënësi i kompanisë.
Wizz Air shtoi gjithashtu se “mohon të gjitha akuzat e bëra nga Codacons, duke përsëritur se i është përmbajtur legjislacionit të shtetit Italian”.
CEO i ITA Airways, Fabio Lazzerini, i mohoi akuzat duke thënë se “nuk ekziston asnjë kartel i tillë”.
Autoritetet italiane treguan se ky hetim pritet të përfundojë deri në fundin e vitit të ardhshëm.
