Ka nga ne që nuk vendosin dot midis pishinës dhe detit, e ka nga ata që i marrin të dyja me vete.
Kompania Holandeze e superyacht-eve Feadship ka mbajtur fshehur larg syrit të botës një mrekulli të lundrimit modern. Pronarët kanë preferuar ta shijojnë privatësinë për të paktën një vit që nga lëshimi në 2019, por sot Lonian dhe gjithë çka bart me vete paraqitet përpara botës me gjithë madhështinë e tij.
Jahti me 5 kate dhe gati 90 metra gjatësi, vishet nga një blu e errët në trup e deri në kiçin e stërgjatë e megjithëse mjaft i madh në dimensione duket mjaft i elegant.
Zona më ekzotike është ajo e plazhit, ku mes katër kabinave-shezlong dhe një bari masiv ndodhet pishina transparente, fundi i së cilës është edhe tavani i beach clubit poshtë saj, dhe për më tepër ka një televizor të montuar në buzë të saj.
Mos të lëmë pa përmendur që kapaku i pishinës hapet e mbyllet si një kabrio për të dhuruar më shumë hapësirë.
Një kat më lart ndodhet një vaskë jacuzzi me sistem ftohje e ngrohje, eksluzivitet vetëm për pronarët.
Në fakt Lonian ka 22 lloje hapjesh e e cila krijon ambient fare të lehtë brenda jashtë dhe akses në ujrat përqark.
Në rast se nevojitet më shumë eksplorim një helikopter ndodhet në bord për çdo rast.
Për ambientet e brendshme misteri vazhdon të mbetet në fuqi, por pa cënuar privatësinë Fedship ka ndarë disa detaje.
Anija mund të mbajë në total 14 mysafir në 7 kabina, përfshi sallën e pritjes së pronarit, katër dhoma të bollshme për miq dhe dy suita VIP. Ndodhen në të gjithashtu 15 kabina ekuipazhi dhe ajo e kapitenit.
E kush nuk do të distancohej socialisht kështu?
