Sunny Hill Festival 2025 riktheu edhe këtë vit atmosferën që e ka bërë të njohur si një nga festivalet më të mira në Evropë. Nga data 1 deri më 3 gusht, Prishtina mirëpriti mbi 100.000 vizitorë që vinin nga e gjithë bota për të parë një përzgjedhje artistësh që kombinonin skenën ndërkombëtare me talentet shqiptare.

Programi i festivalit përfshiu zhanre të ndryshme dhe performanca live nga Dua Lipa deri te Peggy Gou, duke krijuar një atmosferë të pasur dhe energjike që bëri çdo natë të bënte diferencën. Këtë vit, Geek Room ishte aty si media për të përcjellë më pranë ndjekësve tanë atmosferën fantastike.

Dua Lipa, rikthim në Prishtinë me një performancë të paharrueshme

Kryefjala e natës së parë ishte performanca e Dua Lipës, e cila erdhi në Prishtinë si pjesë e turneut “Radical Optimism”. Ajo interpretoi hite të fuqishme si Houdini, Training Season, Levitating, New Rules dhe Don’t Start Now, duke ndezur skenën kryesore dhe krijuar një atmosferë që publikoi e bëri të lëvizte në çdo kënd.

Gjatë performancës, Dua foli në shqip dhe falënderoi publikun, dhe më vonë u bashkua edhe me babain, Dukagjin Lipën, për të kënduar këngën “Era”, një këngë që ajo tha se “e kishte dëgjuar që fëmijë”. Ky moment u ndje si një lidhje kulturore midis artistes dhe publikut, dhe shënoi një nga kulmet emocionale të festivalit.

Fatboy Slim, energjia që ndezi natën e parë në C4

Në natën e parë, në skenën C4 performoi Fatboy Slim, i cili solli një set që ndërthurte ritme të njohura me tinguj elektronikë modernë. Muzika e tij krijoi një atmosferë të gjallë ku publiku nuk ndaloi së lëvizuri. Performanca ishte e shoqëruar me projeksione dhe drita që i jepnin më shumë ngjyrë gjithë skenës. Ishte një nisje shumë e mirë për netët e muzikës elektronike në C4.

Shawn Mendes, nisja e turneut “On the Road Again” në Prishtinë

Dita e dytë ngjiti në skenën kryesore Shawn Mendes, i cili zgjodhi pikërisht Sunny Hill Festival në Prishtinë për të nisur turneun e tij europian “On the Road Again”. Performanca u prit me shumë entuziazëm, dhe që në momentin që u ngjit në skenë, publiku filloi të këndonte bashkë me të çdo këngë, nga hitet si Treat You Better, Mercy, Stitches, There’s Nothing Holdin’ Me Back e deri te In My Blood.Shawn u kujdes të tregonte edhe për mënyrën se si ishte pritur në Prishtinë, duke thënë se “që kur kam shkelur në Kosovë, kam ndjerë një mikpritje si kurrë më parë”.

Gjatë setit, Shawn solli edhe disa këngë nga albumi i tij më i fundit, Shawn, i publikuar në nëntor 2024, i cili është ndjeshëm më personal dhe fokusohet tek eksperiencat që ka kaluar me ankthin dhe rëndësia e shëndetit mendor në jetën e tij. Kjo e bëri performancën edhe më të veçantë, pasi mesazhet e albumit përputhen edhe me frymën përfshirëse që promovon vetë festivali. Mbrëmja u përmbyll me fjalët “Kosova, ju dua!”, dhe një ndjesi të qartë se kjo ishte një natë që kishte rëndësi për të dyja palët, për artistin dhe për publikun.

Mochakk, house energjik në C4 që ndezi festën pas koncertit kryesor

Në të njëjtën natë, pas koncertit të Shawn Mendes, skena C4 vijoi me performancën e Mochakk, DJ nga Brazili i njohur për stilin e tij energjik dhe lëvizjet e pandalshme në skenë. Ai solli një set me ritme house dhe groove që u prit shumë mirë nga publiku, i cili vazhdoi të kërcejë edhe vonë në mbrëmje. Ndjesia e festës nuk u ndërpre për asnjë moment, dhe atmosfera që krijoi Mochakk tregoi pse është një nga emrat më të kërkuar të muzikës elektronike nëpër festivale.

Anyma, arti audio‑vizual që mbylli natën e tretë

Nata e tretë u mbyll nga Anyma, projekti solo i Matteo Milleri, duke sjellë një performancë audio-vizuale që tejkaloi kufijtë e një koncerti tradicional. Duke kombinuar muzikën elektronike me animacione 3D, efekte drite dhe pirroteknike, ai krijoi narrativën e një udhëtimi futurist. Seti ishte ndërtuar me kujdes dhe ndikonte emocionalisht publikun, duke e bërë përvojën më përfshirëse dhe artistike të natës së fundit.

Peggy Gou, festa në C4 që nuk donte të mbaronte

Edhe pas Anyma-s, festa vazhdoi në skenën C4 me setin e Peggy Gou, e cila interpretoi acid house, techno dhe elementë koreano-berlinese. Ajo e mbajti turmën aktive deri në minutat e fundit dhe skena ishte më e mbushura se kurrë më parë. Publiku nuk tregonte shenja lodhje edhe pas shiut të rrëmbyer që ra pak minuta. Kjo po që ishte një sfidë për organizuesit duke sugjeruar në mënyrë simpatike që C4 vitin tjetër mund të jetë edhe më e madhe.

Artistët shqiptarë, prania me vlerë dhe skenë me identitet

Në festival morën pjesë edhe shumë artistë shqiptarë, duke sjellë performanca të shkurtra por me fuqi dhe hapësirë solide në skenë. Tayna me skenografi dhe koreografi dinamike solli një show tërheqës; Kida dallohej për lidhjen e drejtpërdrejtë me publikun; Ledri Vula me karizmën dhe komunikimin direkt dha një performancë të fortë; ndërsa MC Kresha dhe Lyrical Son sollën ritme dhe tekst urbano-hip-hop që i dhanë festivalit një dimension autentik dhe energjik. Kontributi i tyre promovoi kulturën shqiptare në një ambient ndërkombëtar ku mbizotërojnë zërat global.

Kujtimi i vërtetë i festivalit që ruhet përtej skenave

Gjatë të tre ditëve, stenda e merch-it zyrtar të Sunny Hill ishte gjithmonë e frekuentuar. Radha e gjatë tregoi interesin për kujtime fizike nga festivali. Edhe ne u siguruam një bluze zyrtare, një detaj simbolik që ruan kujtime nga një festival që do të mbetet gjatë në mendje.

Sunny Hill Festival 2025 përforcoi statusin e tij si një nga festivalet më të rëndësishëm në Evropë, ku kultura lokale dhe artistët shqiptarë bashkëjetojnë me emra ndërkombëtarë. Ne në Geek Room mezi presim ta përjetojmë edhe vitin tjetër, dhe të shohim se si Sunny Hill do të rritet edhe më tej.