Përmes një raporti të ri të publikuar nga Banka Botërore, të titulluar “Invigorating Growth”, sapo kemi mësuar se në vitet e ardhshme pritet të ketë një rritje të ndjeshme të temperaturave në zonat e mëdha urbane në Ballkanin Perëndimor.
Për fat të keq ky parashikim zbulon se ndërmjet një periudhe kohore nga vitet 1990- 2040, qyteti i Durrësit do të ketë rritjen më të madhe të indeksit të valëve të nxehtësisë krahasuar me qytetet e tjera të mëdha në rajon.
Një faktor që luan rol në rritjen e temperaturave është dhe prania e hapësirave të gjelbra në komunitet. Vullnetarët me sensorët e instaluar nëpër makinat e tyre bënë matje të temperaturave dhe lagështisë së ajrit në qytete të ndryshme, duke zbuluar një diferencë të ndjeshme temperature dhe në lagje të ndryshme të një qyteti. Në disa lagje me hapësira të gjelbra temperaturat ishin 4°C deri në 6°C më të ulta se në zonat e tjera të “betonizuara”.
Në rajon qytete të tjera të rrezikuara nga valët e shumta të nxehtësisë do të jenë dhe Podgorica, Shkodra, Tirana dhe Prizreni, sipas këtij raporti.
Emëtimet e gazrave ndikojnë gjithashtu në rritjen e temperaturave në zonat urbane, rrisin ndotjen e ajrit dhe amplifikojnë rreziqet klimatike në qytete. Megjithatë në raport tregohet se emëtimet e dioksidit të karbonit në Shqipëri janë më të paktat në Ballkanin Perëndimor falë gjenerimit të energjisë nga burimet e rinovueshme.
Por është e padiskutueshme që qytetet duhet të marrin masa për të ulur emëtimet e karbonit në atmosferë për të përmirësuar shëndetin e banorëve dhe për të ndikuar pozitivisht në mjedisin ku banojmë.
