Ne kemi parë shpesh herë që Apple të përfshihet në beteja gjyqësore të ndryshme në lidhje me produktet dhe shërbimet e saja, mirëpo kësaj here situata është disi më ndryshe. Kompania ka vendosur të padisë një regjizor ukrainas, Vasyl Moskalenko, i cili ka realizuar një film komedi të quajtur “Apple-Man”.
Sigurisht, gjëja e parë që mund t’ju shkojë në mendje është se në film është treguar diçka rreth Apple, mirëpo kjo gjë nuk është e vërtetë. Elementi humoristik qëndron në faktin se personazhi kryesor ka superfuqinë e lëvizjes së mollëve në ajër. Fillimisht ky film mori një financim të gjerë në Kickstarter prej $120,000.
Megjithatë departamenti ligjor i Apple është shumë i pakënaqur kur shikon se emri i kompanisë së tyre është i përfshirë në një film komedi. iPhone in Canada raportoi se Apple ka lajmëruar se po ndjek rrugët ligjore kundër regjizorit Moskalenko.
Moskalenko deklaron se kjo padi e ngritur nga Apple është tepër e gabuar pasi në film nuk përmendet asnjë nga produktet e Apple. Tashmë ai është i frikësuar se të gjitha fondet e grumbulluara në Kickstarter do të shpenzohen në një betejë e cila mund të detyrojë fshirjen e këtij filmi.
“Filmi im flet më tepër rreth mollëve, frutave. Nëse regjistrimi im nuk do të pranohet, Apple mund të kërkojë të fshijë filmin tim pas publikimit.” tha Moskalenko.
