Shpesh herë kemi dëgjuar se si Apple përpiqet të mbrojë logon e saj të mollës së kafshuar, mirëpo kësaj here duket se ka shkuar shumë larg. Prodhuesi i iPhone po përpiqet që të fitojë të drejtat e pronësisë së imazhit të mollëve në Zvicër, siç raporton dhe Wired UK.
Nëse Apple është e suksesshme në këtë tentativë, Fruit Union Suisse, një kompani frutash që ekziston prej 111 vitesh, do të detyrohet të ndërrojë logon.
“Ne e kemi shumë të vështirë ta kuptojmë këtë gjë, pasi në këtë rast ato nuk po përpiqen të mbrojnë mollën e tyre të kafshuar.” tha drejtuesi i Fruit Union Suisse, Jimmy Mariethoz. “Objektiva e tyre është që të zotërojnë të drejtat e imazheve për mollët e vërteta, e cila në kuptimin tonë është diçka shumë universale dhe çdokush duhet të jetë i lirë ta përdorë.”
Për herë të parë Apple u përpoq që të fitonte të drejtat e pronësisë së mollëve në Zvicër në vitin 2017, kur aplikoi për një imazh bardh e zi të një molle jeshile, e cila nuk ishte e kafshuar, por një mollë e plotë.
Kjo nuk është hera e parë që kompani të ndryshme përpiqen që të fitojnë të drejtat e pronësisë së mallrave tepër të pranishme mes nesh. Megjithatë, në një studim nga Tech Transparency Project u zbulua se Apple ka aplikuar më shumë herë për të drejtat e pronësisë në një periudhë 3 vjeçare se Amazon, Google, Microsoft dhe Facebook së bashku.
