Kompania që jep makina me qera, Hertz, ka porositur 100,000 Tesla si pjesë e planeve ambicioze për të elektrifikuar flotën e saj. Një pjesë e makinave Tesla Model 3 do të jenë të gatshme për t’u marrë me qera në Evropë dhe Amerikë duke filluar që nga muaji nëntor, tha kompania në një deklaratë për shtyp.
Pasi blerja e këtyre makinave u bë publike, vlera në treg e Tesla arriti mbi $1 trilionë. Kjo ngjarje e vendosi kompaninë e prodhimit të makinave në të njejtën kategori me kompanitë mjaft të njohura si Apple, Amazon dhe Microsoft.
Fillimisht raportimet mbi blerjen erdhën nga Bloomberg, e cila tregoi se kjo marrëveshje është një ndër më të mëdhatë në fushën e makinave elektrike, e cila do të sjellë rreth $4.2 miliardë fitime për Tesla. Çdo person që do të marrë me qera një Tesla nga Hertz do të ketë mundësinë që të përdorë rrjetin me 3,000 superchargers të kompanisë në SHBA dhe Evropë.
GOAT’s recognize GOAT’s. Introducing our all new EV fleet (@TomBrady not included) #Hertz #LetsGo pic.twitter.com/TElSE2PDKb
— Hertz (@Hertz) October 25, 2021
Gjatë majit të vitit të kaluar Hertz shkoi drejt falimentimit pasi ajo u godit shumë fort nga pandemia. Kjo kompani operon prej më shumë se 100 vitesh, dhe pas kësaj goditjeje u rifinancua nga Knighthead Capital Management.
Në një deklaratë për shtyp, CEO Mark Fields tha: “Makinat elektrike janë tashmë shumë në modë, dhe ne sapo kemi filluar të shikojmë një rritje në interesin dhe kërkesën globale. Hertz do të drejtojë tregun me flotën më të madhe të EV në Amerikën e Veriut dhe do të punojë fort për të siguruar eksperiencën më të mirë rentale dhe të karikimit për klientët tanë në të gjithë botën.”
