Tesla ka si qëllim të nisë prodhimin në masë të Cybertruck në fund të vitit 2023, 2 vite me vonesë nga plani fillestar. Kompania tregoi muajin e kaluar se po punon për të përgatitur fabrikën në Austin, Texas për prodhimin e modelit të ri. “Ne jemi në xhiron finale për Cybertruck,” tha Musk në një konferencë me analistët financiar.
Një rritje graduale që do të nisë nga gjysma e dytë e vitit të ardhshëm për prodhimin e këtij modeli, dhe me sa duket Tesla nuk do të regjistrojë fitime deri në fillim të 2024. Dhe të gjithë personat që kanë rezervuar për $100 makinën e tyre Cybertruck ky është një lajm jo dhe aq i mirë, pasi do të duhet të presin dhe 1 vit tjetër për të marrë makinën e tyre elektrike.
Çmimi final i Cybertruck ende nuk është publikuar. Në 2019, Tesla kishte projektuar një çmim fillestar nën $40,000, mirëpo çmimet për makinat e reja janë rritur shumë që nga ajo kohë.
Kur Musk prezantoi këtë model në 2019, ai dëshiroi të tregonte se xhamat janë të pathyeshëm, por për fat të keq gjatë testimeve ndodhi e kundërta. Që nga ajo kohë afati i prodhimit është shtyrë 3 herë: nga fundi i 2021 në fundin e 2022, më pas në fillimin e 2023 dhe tashmë në fund të 2023.
