Dizenjuesi britanik Thomas Heatherwick prezantoi në Goodwood Festival një makinë të re elektrike e cila është dizenjuar për të pastruar ajrin gjatë kohës që është në lëvizje.
Analistët nuk janë tepër të bindur nga ky koncept, mirëpo Heatherwick tregoi se planifikon prodhimin e 1 milionë makinave në vitin 2023. Ai njihet më tepër për projektet e tij arkitekturale si zyrat qendrore të Google në Kaliforni dhe Londër, dhe kjo është hera e parë që dizenjon një makinë.
Makina e quajtur Airo ka një tavan të madh prej xhami dhe hapësira e brendshme i ngjason më tepër një dhome, me sedilje të lëvizshme që mund të shndërrohen në krevat dhe një tavolinë qendrore për të konsumuar ushqim ose për t’u mbledhur me shokët.
Eksteriori ka shumë vijëzime të cilat do të ndihmojnë në kalimin e ajrit përmes flitrave të vendosura në pjesën e përparme të makinës. Heatherwick tregoi se sasia e ajrit të pastruar përgjatë një viti do të jetë sa madhësia e një topi tenisi. “Ju mund të mendoni se kjo është një sasi mjaft e vogël, por mjafton të krahasoni madhësinë e një topi tenisi me mushkëritë tuaja. Këtu duhet të shtoni dhe faktin që në Kinë do të jenë 1 milionë makina, të cilat do të rrisin sasinë e ajrit të pastruar.” tha ai.
Nga ana tjetër, Peter Wells, një profesor në Cardiff Business School tha se: “Kontributi i kësaj makine në pastrimin e ajrit në qytetet me ajër të ndotur do të ishte aq i vogël sa do të ishte e pamundur për t’u matur.”
