Ekranet me prekje dhe kontrollimi i pjesës më të madhe të shërbimeve brenda në makinë nëpërmjet këtij ekrani ka ardhur shumë në modë gjatë viteve të fundit. Megjithatë, jo gjithmonë metodat e reja të dizenjimit janë më të mirat.
Hyundai mendon se një gjë e tillë është tepër e rrezikshme për drejtuesit e makinave, prandaj ka premtuar se do të ofrojë gjithmonë butona fizikë në makinat që prodhon. Drejtuesi i departamentit të dizenjimit në Hyundai, Sang Yup Lee, përsëriti qëndrimin e kompanisë ndaj butonave për kontrollimin e shërbimeve në makinë me Hyundai Kona-n e re.
“Ne kemi përdorur butonat fizikë mjaft mirë gjatë viteve të fundit. Për mua, butonat e lidhura me sigurinë duhet të jenë gjithmonë fizike.” tha Lee.
Ky është një dizenjim që bën shumë sens. Në disa makina moderne, ndryshimi i temperaturës apo volumit të muzikës kërkon që të prekni vazhdimisht ekranin me prekje, mirëpo nëpërmjet butonave fizikë drejtuesit nuk kanë pse të largojnë sytë nga rruga gjatë ndryshimit të tyre falë feedback-ut që butonat fizikë japin.
Lee tregoi se butonat fizikë do të jenë prioritet për sa kohë makina do të ketë nevojë për një drejtues human. “Kur vjen puna tek drejtimi autonom i nivelit të 4-t, çdo buton mund të jetë dixhital.” shtoi Lee.
