Ford ka patentuar në mënyrë të suksesshme një sistem të ri që lejon makinat të rikthehen automatikisht drejt pikës së autorizuar të shitjes nëse pronari i ri i makinës nuk arrin të bëjë pagesat e saj në kohë. Kompania parashikon se makina mund të kthehet në showroom ose direkt në një varrezë makinash nëse vlera e saj është shumë e ulët.
Megjithatë ekspertët e sigurisë paralajmërojnë se sistemi i propozuar do të mund të përdoret në të ardhmen për vjedhjen e makinave nga distanca.
Ford kishte aplikuar për këtë patentim që në vitin 2021, mirëpo morri aprovoimin vetëm javën e kaluar. Sigurisht do të kishte disa masa të tjera që kompania do të ndërmarrë para se të marrë vendimin për ta vetëdrejtuar makinën drejt showroom-it. Si fillim makina do të bëhet shumë e parehatshme për t’u drejtuar, deri në pikën që do të jetë e pamundur për t’u drejtuar nëse nuk kryhet pagesa.
Do të çaktivizohet opsionet si GPS, sistemi i muzikës, i ajrit të kondicionuar për të krijuar një diskomfort për drejtuesit. Nëse këto shenja paralajmëruese nuk vlerësohen nga drejtuesi, në patentim tregohet se makina do të bëjë një zhurmë si alarm sa herë që drejtuesi të futet në makinë.
Diskomforti do të vazhdojë duke limituar përdorimin e makinës vetëm në disa ditë të caktuara të javës, duke e bërë të papërdorshme gjatë pushimeve të fundjavës. Nëse të gjitha këto masa nuk e detyrojnë pronarin të paguajë, atëherë makina do të largohet vetë në drejtim të pikës së autorizuar të shitjes ose varrezave të makinave.
