Italianët mund të jenë në vështirësi, por kush do t’ia dijë për Covid-19 teksa je duke rrëshkitur me shpejtësinë e dritës, nëpër ujrat e Mesdheut me një super-yacht Technomar for Lamborghini ’63.
Po po e kemi më se seriozisht, mjeshtrat e super makinave kanë sjellë një super yacht, duke i qëndruar besnik, cilësisë dhe stilit tipik prej Lambo.
Njëjtë si kushërinjtë e vetë, ky mjet do të ketë fuqinë në fokus, dy motorrat MAN V12-2000 HP do të prodhojnë në total 4000 kuaj fuqi çka do ti lejojë një shpejtësi maksimale prej 60 nyjesh.
19.2 metra i gjatë dhe 24 ton ekselencë vizuale pasi gjithë trashëgimia Lamborghini vijon të respektohet.
Kënde të mprehta, ngjyra që bien në sy dhe formë aerodinamikisht klinike.
Pjesa e çatisë ngjason me modelet kabrio, ndërsa forma Y e dritave është marrë direkt nga Terzo Millennio.
Në brendësi gjenden plot forma të tjera heksagonale, fibra karboni, dhe kroskot i frymëzuar nga makinat Lamborghini.
Centro Stile dhe The Italian Sea Group, deklarojnë se referencat e këtij projekti janë Sian FKP 37 por edhe klasiket Countach e Miura. Numri 63 në fund përkon me vitin 1963 kur kompania filloi të ndërtojë makina.
Technomar for Lamborghini ’63 pritet të dalë në fillim të 2021.
