Me sa duket nga publikimi i të dhënave të 553 milionë përdoruesve nuk ka shpëtuar as vetë CEO i Facebook, Mark Zuckerberg. Sipas një raportimi, bashkë me numrin e tij të celularit janë publikuar dhe të dhënat mbi vendndodhjen, detajet e martesës, datëlindja dhe Facebook user ID. Përveç Mark, në listë rezultojnë edhe të dhënat e bashkëthemeluesve Chris Hughes dhe Dustin Moskovitz.
Por më e bukura qëndron tek fakti se një security researcher, pasi i pa këto të dhëna zbuloi se numri i publikuar i Zuckerberg rezultonte i regjistruar në aplikacionin rival të Whatssap, Signal. Zbulimin e tij ai e shpërndau në Twitter më pas duke shkruajtur: “Mark Zuckerberg respekton gjithashtu privatësinë e tij, duke përdorur një aplikacion që ka end-to-end encryption dhe nuk zotërohet nga Facebook.”
Sigurisht që as Signal nuk mbeti pa publikuar gjetjen duke rikujtuar ndryshimin e rregullave të privatësisë së Facebook nga 15 maji. “Mark ju tregon shembullin që duhet të ndiqni” është shprehur Signal duke nënkuptuar se kjo është një arsye më shumë përse duhet të fillojmë të përdorim app-in e tyre.
Lajmi vjen në një kohë kur politikat e reja të Whatssap revoltuan shumë njerëz dhe i detyruan ata të lëvizin drejt aplikacioneve më të sigurta si Signal ose Telegram. Këto politika të reja do të aplikohen në mënyrë përfundimtare në maj të këtij viti dhe do të ndryshojnë mënyrën se si Facebook mund të aksesojë bisedat e përdoruesve me adresat e biznesit në Whatssap.
.
