YouTube po teston një shërbim të ri të mundësuar nga AI që sjell AI Overviews të Google në platformën e saj, duke synuar të përmirësojë zbulimin e përmbajtjeve përmes kërkimit.
Në vend që të ofrojë përmbledhje të bazuara në tekst, YouTube do të shfaqë një karusel me videoklipe që AI i identifikon si më të rëndësishmet për pyetjet që një përdorues kërkon. Sipas YouTube, kjo veçori do t’i ndihmojë përdoruesit të gjejnë përmbajtje më lehtë dhe të zbulojnë tema dhe informacione të lidhura, veçanërisht kur kërkojnë për produkte si “kufjet më të mira që anulojnë zhurmën” ose aktivitete si “muzetë për t’u vizituar në Shqipëri“.
Ndërsa tingëllon e ngjashme me rezultatet dhe reklamat ekzistuese të kërkimit në YouTube, ndryshimi kryesor është se AI do të përdorë sinjale kontekstuale në vend që të mbështetet thjesht në përputhjet e fjalëve kyçe. Përditësimi nuk duket të jetë një ndryshim i rrënjësishëm, por prapëseprapë mund të përmirësojë gjerësinë dhe thellësinë e rezultateve të kërkimit, duke u ofruar përdoruesve më shumë mënyra për të gjetur përmbajtje të dobishme.
Aktualisht, ky karusel i ri kërkimi i AI është i disponueshëm vetëm si një provë në shkallë të vogël, i lançuar në një grup të kufizuar përdoruesish të YouTube Premium në SHBA për pyetje në gjuhën angleze. Mbetet për t’u parë nëse kjo veçori do ta ndryshojë në mënyrë domethënëse përvojën e përdoruesit, por ajo përfaqëson një shembull tjetër të platformave që integrojnë inteligjencën artificiale në më shumë aspekte të shërbimeve të tyre.
