YouTube po sjell funksionin Google Lens në videot Shorts, duke shtuar një mënyrë të re interaktive për të kërkuar informacion në kohë reale brenda videove. Ky funksion i ri do të prezantohet në një version beta gjatë javëve në vijim dhe do të jetë i disponueshëm në aplikacionin mobile të YouTube.
Me Lens, përdoruesit mund të identifikojnë objekte, kafshë, bimë, apo monumente që shfaqen në një video Shorts. Për shembull, nëse një pikë referimi shfaqet në sfond, përdoruesi mund ta zgjedhë atë përmes Lens për të mësuar më shumë rreth vendndodhjes së videos.
Për ta përdorur funksionin, duhet të ndaloni videon, të klikoni ikonën Lens në menunë sipër dhe të rrethoni, theksoni, ose klikoni objektin që dëshironi të kërkoni. Lens do të shfaqë rezultate vizuale dhe informacion të ngjashëm drejtpërdrejt mbi videon. Pasi të klikoni një rezultat, mund të riktheheni shpejt te videoja pa e ndërprerë përvojën tuaj të shikimit.
Google ka zgjeruar përdorimin e Lens edhe në funksione të tjera, përfshirë kërkimin me video dhe ndihmën për të gjetur produkte në dyqane. Ky zhvillim tregon përpjekjet e kompanisë për të lidhur botën vizuale me motorët e kërkimit në mënyrë më inteligjente dhe praktike.
Megjithatë, YouTube sqaron se Lens nuk përdor njohje biometrike të fytyrës për të identifikuar persona specifikë, megjithëse mund të shfaqë rezultate për figura publike të njohura. Gjithashtu, gjatë fazës testuese, rezultatet e Lens nuk do të përmbajnë reklama, dhe funksioni nuk do të aktivizohet në Shorts që përmbajnë links për blerje.
Ky funksion premton të bëjë përvojën në Shorts më interaktive dhe informuese.
