YouTube planifikon të paguajë $100 milionë krijuesit që do të përdorin YouTube Shorts përgjatë vitit të ardhshëm. Qëllimi i tyre është inkurajimi i krijuesve për t’u distancuar nga TikTok dhe për të postuar përmbajtje rregullisht në këtë platformë.
Shuma që secili nga krijuesit do të përfitojë është akoma e pavendosur. YouTube thotë se do të kontaktojnë me ata çdo muaj, zakonisht me personat që kanë më tepër shikueshmëri. “Me mijëra” krijues mund të paguhen çdo muaj për postimet e tyre në Shorts. Kërkesa e vetme nga YouTube është publikimi i përmbajtjeve origjinale të cilat sigurisht respektojnë udhëzimet e komunitetit.
YouTube filloi lançimin e shërbimit Shorts në SHBA në mars. Videot e shkurtra shfaqen në aplikacionin për smartphone të YouTube, njësoj si TikTok, ose Reels të Instagram, duke rreshqitur nga njera video ne tjetrën në një endless feed.
Kompanitë tjera kanë ndjekur të njejtën taktikë për të tërhequr krijuesit në aplikacionet përkatëse. TikTok lançoi një fond prej $200 milionë në korrik të 2020, ndërsa Snapchat pagoi $1 milionë në ditë për një periudhë kohore pas lançimit të Spotlight.
Proçesi i pagimit do të nisë në SHBA dhe Indi, dy vendet e para ku Shorts u lançua fillimisht, dhe më pas do të shpërndahet drejt vendeve të tjera. YouTube thotë se fondet mund të fillojnë të shpërndahen në vitin 2022.
