WhatsApp po nxjerr një përditësim të ri, versionin 2.23.18.21, për përdoruesit e tij beta në Android, ku ka prezantuar një shërbim të ri multi-account dhe një ndërfaqe të ridizenjuar.
Mbështetja e disa llogarive në një smartphone i lejon përdoruesit të shtojnë një llogari të dytë në të njëjtën pajisje pa përdorur “aplikacione paralele ose të klonuara”. Nga ana tjetër ndërfaqja e ridizenjuar ofron një përvojë më moderne gjatë lundrimit nëpër opsionet brenda aplikacionit.
Karakteristikat e reja janë të disponueshme për testuesit beta dhe do të shpërndahen për përdoruesit në versionin e qëndrueshëm gjatë ditëve në vijim.
Menaxhimi i thjeshtë i llogarive të ndryshme WhatsApp
Shërbimi i ri në WhatsApp beta për Android thuhet se u mundëson përdoruesve të menaxhojnë bisedat nga shumë llogari brenda një aplikacioni të vetëm. Duke i mbajtur të ndara njoftimet dhe bisedat, përdoruesit do të mund të lëvizin midis llogarive në një pajisje të vetme pa kërkuar pajisje të ndryshme ose aplikacione/shërbime paralele. Aktualisht, përdoruesit mund të shtojnë vetëm një llogari shtesë, por WhatsApp mund ta rrisë këtë kufi në përditësimet e ardhshme pasi të ketë testuar me sukses shërbimin në fazën beta.
Ja se si të provoni shërbimin e ri
Për të menaxhuar bisedat nga llogari të ndryshme në WhatsApp beta për Android, shkoni te Settings, prekni mbi ikonën e shigjetës pranë kodit QR ngjitur me emrin tuaj dhe shtoni një llogari të re.
