Plani premium i abonimit në WhatsApp ende nuk është i disponueshëm në të gjithë rajonet në botë, mirëpo ka arritur pranë disa bizneseve që do të testojnë këtë shërbim. Pra, ky plan abonimi mund të aksesohet vetëm nga bizneset që janë bërë pjesë e beta program të WhatsApp.
Sipas WABetaInfo, plani i abonimit për bizneset do të sjellë disa shërbime të cilat nuk janë shumë të nevojshme për një përdorues normal, ndërkohë që janë të rëndësishme për bizneset.
Abonimi në WhatsApp do t’i ofrojë bizneseve gjenerimin e një linku të personalizueshëm, e cila i drejton klientët direkt në adresën e biznesit në aplikacion, dhe ky link mund të ndërrohet çdo 3 muaj. Në këtë mënyrë klientët do ta kenë më të thjeshtë të gjejnë një numër të biznesit nëpërmjet klikimit në link në vend që të regjistrojnë numrin në smartphone. Telegram ofron një shërbim të ngjashëm prej disa kohësh.
Gjithashtu pas abonimit në versionin premium adresa e biznesit do të mund të hapet deri në 10 pajisje të ndryshme njëkohësisht, dhe aplikacioni do t’ju lejojë të kryeni videotelefonata me deri në 32 persona njëkohësisht.
Mirëpo meqë shërbimi është ende në fazën beta, WhatsApp nuk ka lëshuar një deklaratë zyrtare për shtyp, pra nuk është ende e ditur se sa do të kushtojë ky abonim dhe se kur do të lançohet për të gjithë përdoruesit.
