WhatsApp ka rifreskuar shërbimet e aplikacionit për Windows, në mënyrë që ai të jetë sa më i ngjashëm me aplikacionin për mobile. Përmes një lajmërimi, Mark Zuckerberg tregoi se versioni i ri i aplikacionit lejon që përdoruesit të bëjnë video-telefonata të enkriptuara me 8 pjesëmarrës njëkohësisht.
Në telefonatat vetëm me audio mund të marrin pjesë deri në 32 përdorues, duke e bërë këtë shërbim mjaft të përdorshëm në mbledhjet në kompani të ndryshme apo grumbullimet familjare, ku të gjithë të afërmit tuaj mund të marrin pjesë. Megjithatë kompania nuk mjaftohet me kaq, dhe tregon se po punon për të rritur akoma më tepër numrin e pjesëmarrësve në këto telefonata.
Bashkë me përmirësimin e eksperiencës së video-telefonatave, WhatsApp tregoi se ka bërë disa përmirësime të tjera në ndërlidhjen midis pajisjeve të ndryshme. tashmë është më e thjeshtë dhe më e shpejtë lidhja e pajisjeve të reja me një adresë të përdoruesit. Edhe sinkronizimi është përmirësuar duke lejuar përdoruesit që të aksesojnë njëkohësisht chat-et e tyre në 4 pajisje të ndryshme.
Shërbimi i vërtetë multi-device syncing u lançua nga kompania në vitin 2021, dhe që nga ajo kohë përdoruesit mund të aksesonin adresën e tyre nga pajisje të tjera dhe nëse smartphone-i nuk ishte online.
