Meta ka njoftuar se po përgatitet të nisë integrimin e bisedave nga platformat e palëve të treta në WhatsApp për përdoruesit në Evropë, në përputhje me kërkesat e Aktit të Tregjeve Digjitale (DMA). Ky ligj i BE-së detyron kompanitë e mëdha teknologjike të sigurojnë ndërveprueshmëri mes shërbimeve të mesazheve, në mënyrë që përdoruesit të mund të komunikojnë edhe me aplikacione të tjera që zgjedhin të jenë kompatibël.
Pas disa muajsh testimesh të kufizuara, Meta ka konfirmuar se së shpejti përdoruesit europianë të WhatsApp-it do të mund të shkëmbejnë mesazhe, foto, video, zëra dhe skedarë direkt me përdoruesit e BirdyChat dhe Haiket. Krijimi i grupeve mes aplikacioneve të ndryshme pritet të aktivizohet më vonë, sapo partnerët të jenë gati ta mbështesin funksionin.
Në javët dhe muajt e ardhshëm, përdoruesit në rajonin evropian do të shohin një njoftim në seksionin “Settings” ku shpjegohet procesi i aktivizimit të komunikimit me aplikacione të tjera. Integrimi do të funksionojë vetëm në Android dhe iOS, ndërsa WhatsApp në desktop, web ose tablet nuk do ta mbështesë këtë mundësi.
Përdoruesit mund ta aktivizojnë ose caktivizojnë komunikimin me palë të treta kur të duan. Meta thekson se bashkëpunimi me BirdyChat dhe Haiket vjen pas 3 vitesh pune me kompanitë evropiane të mesazheve dhe Komisionin Evropian, për të krijuar një zgjidhje të sigurt dhe në përputhje me DMA.
Një kërkesë thelbësore është siguria. Çdo aplikacion i integruar duhet të përdorë të njëjtin nivel enkriptimi fund–në–fund si WhatsApp. Meta, nga ana tjetër, po kujdeset që përdoruesit të dallojnë qartë mesazhet nga WhatsApp dhe ato nga aplikacione të tjera.
Që nga shtatori 2024, kompania ka demonstruar sesi do të duken këto integrime: përdoruesit mund të zgjedhin një dosje të veçantë për mesazhet e palëve të treta ose t’i bashkojnë në një listë të vetme pritjeje. Për më tepër, WhatsApp do të njoftojë çdo herë kur një aplikacion i ri bëhet i pajtueshëm.
