Presidenti i SHBA, Donald Trump, njoftoi të premten se Shtetet e Bashkuara do të nisin bisedimet me Kinën të hënën ose të martën për një marrëveshje të mundshme mbi aplikacionin e famshëm TikTok. Duke folur për gazetarët në bordin e Air Force One, Trump tha se SHBA “praktikisht” e kanë një marrëveshje të gatshme për blerjen e TikTok dhe se bisedimet mund të përfshijnë presidentin kinez Xi Jinping ose një nga përfaqësuesit e tij.
Më herët, Trump kishte vendosur afatin deri më 17 shtator që kompania kineze ByteDance të shiste asetet e saj në SHBA për TikTok. Një marrëveshje ishte në përgatitje gjatë pranverës për të ndarë degën amerikane të TikTok në një kompani të re të zotëruar nga investitorë amerikanë, por u pezullua pasi Kina la të kuptohej se nuk do ta miratonte atë pas vendimeve të Trump për tarifat e larta ndaj mallrave kineze.
Trump pranoi se marrëveshja ka shumë mundësi të kërkojë miratimin e Kinës. Kur u pyet për mundësinë që Kina të pranojë marrëveshjen, ai tha: “Nuk jam i sigurt, por besoj se po.” Ai theksoi marrëdhëniet e mira me presidentin Xi dhe shtoi se marrëveshja do të ishte e mirë si për Kinën, ashtu edhe për SHBA.
Qëllimi i marrëveshjes është të adresojë shqetësimet e sigurisë kombëtare të SHBA-së për pronësinë kineze të TikTok, duke synuar të shmanget rreziku i përdorimit të të dhënave nga qeveria kineze përmes kalimit të operacioneve në një kompani amerikane.
