Një raport nga Reuters thotë se puna ka vazhduar që nga viti i kaluar për të krijuar një version të algoritmit të rekomandimeve të TikTok që funksionon në mënyrë të pavarur nga Douyin, versioni kinez i aplikacionit i operuar nga kompania e tij mëmë ByteDance.
Sipas burimeve të paidentifikuara, përfundimi i projektit mund të zgjasë më shumë se një vit si pjesë e një plani për t’u treguar ligjvënësve se biznesi amerikan i TikTok është i pavarur nga pronari i tij në Pekin. Raporti thotë se drejtuesit kanë folur për projektin në takime të përbashkëta dhe në sistemin e brendshëm të mesazheve të kompanisë, Lark. Burimet thanë gjithashtu se ndarja e kodit burimor do ta shkëpuste TikTok nga “fuqia masive e zhvillimit inxhinierik” të kompanisë së tij mëmë.
Megjithatë TikTok u përgjigj menjëherë ndaj këtyre raportimeve duke postuar në X: “Historia e Reuters e publikuar sot është një mashtrim dhe faktikisht e pasaktë“.
TikTok është përpjekur të bindë ligjvënësit për sigurinë e të dhënave të përdoruesve në SHBA më parë, me “Project Texas” që e përshkroi si “një iniciativë e paprecedentë e dedikuar për ta bërë çdo amerikan në TikTok të ndjehet i sigurt, me besim se të dhënat e tyre janë të sigurta dhe platforma është e mbrojtur nga ndikimi i jashtëm.”
TikTok tashmë po padit qeverinë amerikane për ligjin që i jep kompanisë afat deri më 19 janar 2025 që t’ia kalojë kontrollin e aplikacionit dikujt tjetër ose të përballet me një ndalim në të gjithë SHBA.
