TikTok ka arritur të krijojë një mënyrë të re që krijuesit të fitojnë akoma dhe më tepër para. Kompania planifikon të nisë shpërndarjen e një pjese të fitimeve me krijuesit më të mirë në platformë nëse videot e tyre luhen së bashku me reklama të caktuara. Ky program përdor të njejtën mënyrë që dhe YouTube përdor për të shpërblyer krijuesit.
TikTok Pulse do të bëjë të mundur që në top 4% e të gjithë videove në TikTok të luhet një reklamë e caktuar. Të gjithë krijuesit apo publikuesit me më tepër se 100,000 ndjekës do të mund të përfitojnë para nga programi TikTok Pulse sa herë që videot e tyre shikohen.
Menaxherja e përgjithshme për Amerikën e Veriut, Sandie Hawkins tha se TikTok do të shpërndajë 50% të fitimeve të gjeneruara nga reklamat me krijuesit e aprovuar (YouTube shpërndan 55% të fitimeve me krijuesit më të ndjekur). Ajo lajmëroi gjithashtu se TikTok Pulse do të lançohet në qershor në SHBA, dhe më pas do të zgjerohet në tregjet e tjera.
Deri më tani, mënyra kryesore e kompensimit të krijuesve nga ana e TikTok ishte përmes “Creator Fund”, i cili kompensonte krijues të përzgjedhur bazuar në popullaritetin e videove të tyre. Mirëpo këto shpërblime ishin të vogla dhe jo të qëndrueshme, sipas krijuesve.
