Studimi i ri nga specialistët e sigurisë së identitetit dixhital, ID Crypt Global, zbulon se numri i llogarive të rreme të mediave sociale në TikTok është rritur me më shumë se 230% vetëm vitin e kaluar, duke e bërë më të vështirë luftën kundër publikimit të përmbajtjeve ngacmuese, që promovojnë vetëdëmtimin, keqinformojnë dhe nxisin shfrytëzimin seksual të fëmijëve.
ID Crypt Global ka analizuar se si numri i llogarive të rreme që eleminohen nga Facebook dhe TikTok ka ndryshuar gjatë vitit të kaluar. Të dhënat tregojnë se në tremujorin e parë 2024, Facebook hoqi 631 milionë llogari të rreme. Kjo shënon një rritje vjetore prej 48.1% krahasuar me numrin prej 426 milionë të TM1 2023.
Por kjo rritje e konsiderueshme nuk është asgjë në krahasim me atë të regjistruar nga TikTok. Vitin e kaluar, numri i heqjeve të llogarive të rreme në platformë është rritur me 232.5%, duke përfshirë një rritje prej 146.1% vetëm në tremujorin e kaluar. Por nuk janë vetëm llogaritë e rreme që po luftohen nga platformat sociale.
Në fakt, ballafaqimi me llogari të rreme mund të jetë duke shpërqendruar platformat nga një problem tjetër i rëndësishëm si publikimi i përmbajtjeve të ndaluara ose të paligjshme që përhapet brenda minutave. Sipas të dhënave nga Snapchat, u ndërmorën veprime kundër më shumë se 3.6 milionë llogarive për përhapjen e përmbajtjeve të ndaluara ose të paligjshme vetëm midis korrikut – dhjetor 2023.
36.6% e këtyre ndalimeve ishin për shkak të përmbajtjes seksuale eksplicite. 25.9% e paralajmërimeve ose bllokimeve ishin për shkak të përmbajtjes që promovon ngacmim dhe 17.9% ishin për shkak të spam.
Arsyet e tjera përfshijnë përmbajtjen rreth drogave (4.6%), shfrytëzimin seksual të fëmijëve (5.7%), gjuhën e urrejtjes (2.7%), kërcënimet me dhunë (2.3%) dhe vetëdëmtimin/vetëvrasjen (0.8%).
