Një ndër drejtuesit e lartë të Meta mori kohën e nevojshme për t’i prezantuar punonjësve pamjet e para të aplikacionit më të ri që kompania po zhvillon, “Project 92”, i cili do të rivalizojë Twitter.
Ky aplikacion i ri do të bazohet në Instagram dhe do të integrohet me ActivityPub, një protokoll i decentralizuar për rrjetet sociale. Në këtë mënyrë përdoruesit do të jenë në gjendje të përdorin në “Project 92” adresat e tyre dhe ndjekësit që kanë në aplikacione të tjera që kanë të integruar protokollin ActivityPub, duke përfshirë këtu dhe Mastodon.
Chris Cox quajti këtë produkt gjatë prezantimit “përgjigja jonë kundrejt Twitter”. Project 92 do të përdorë sistemin e adresave të Instagram për t’u regjistruar. Dhe pse emri i koduar për momentin është Project 92, mendohet se emri publik do të jetë Threads.
“Ne kemi dëgjuar shumë krijues dhe figura publike që janë të interesuar të përdorin një platformë që drejtohet në mënyrë të besueshme dhe që mund ta besojnë me shpërndarjen e deklaratave të tyre.” tha Cox, duke kritikuar kështu drejtimin e Twitter që pas blerjes së Musk.
Ai tha se qëllimi i kompanisë për këtë aplikacion ishte që të jetë i sigurtë, i lehtë për t’u përdorur si dhe i besueshëm, duke u siguruar që të gjithë krijuesit të kenë një hapësirë të qëndrueshme për të rritur audiencën e tyre.
