Gjatë ditës së martë në konferencën online Ignite, Microsoft deklaroi se do të publikojë një aplikacion të ri në paketën Office të quajtur Loop, të cilën njerëzit mund ta përdorin për të bashkëpunuar në projekte të ndryshme.
Kjo përpjekje e re nga Microsoft tregon se ajo po mundohet t’i kushtojë më tepër vëmendje personave të abonuar në Office, të cilët do të fillojnë të paguajnë më tepër vitin e ardhshëm për të përfituar shërbimet e aplikacionit.
Loop premton një alternativë moderne, e cila është tepër e rëndësishme pasi Microsoft po përballet ditë pas dite me konkurentët e rinj si Airtable, Coda dhe Notion. “Këto aplikacione të reja janë tepër të afta në krijimin e përmbajtjeve të reja, por gjëja që i mungon atyre është komunikimi.” tha Jared Spataro, zëvëndës president në Microsoft.
Punonjësit mund të shpërndajnë elemente të Loop në chat-et në Teams, madje ato mund të diskutojnë në mënyrë të shpejtë projektet në Loop duke nisur telefonata me zë ose me video në Teams, e cila tashmë numëron mbi 250 milionë përdorues aktivë.
Loop përbëhet nga 3 elementë:
Komponentët: Persona të ndryshëm mund të lexojnë njëkohësisht dhe të kontribuojnë në krijimin e dokumentit.
Faqet: Në këto dokumente të kompletuara njerëzit mund të shkruajnë një tekst, të vendosin reagime dhe të gjejnë komponentë, links apo dokumente të lidhura me Loop.
Workspaces: Këto janë “arenat” ku njerëzit mund të kontrollojnë progresin e projektit dhe të vendosin reagime, pak a shumë ajo do të funksionojë si një qendër menaxhimi për projekte të ndryshme.