ByteDance, kompania mëmë e TikTok, po përgatitet për t’u futur seriozisht në hapësirën e realitetit virtual, sipas një raporti nga Protcol. Një burim pranë kompanisë tregoi se ByteDance po planifikon të investojë “shumë para” për zhvillimin e përmbajtjeve VR.
Pjesa më e madhe e investimit të ByteDance do të shkojë për punësimin e personelit të ri. Pico, prodhuesi kinez i VR Headset që u ble nga ByteDance vitin e kaluar, ka listuar 40 vende të reja pune, që nga drejtues të strategjisë për lojrat VR e deri tek game operation manager. Ndër këto listime mund të shikohet një vend i lirë për inxhinierë optik dhe inxhinierë elektrikë për dizajnin e sistemit.
Pico po kërkon gjithashtu një drejtues për shitjet drejt konsumatorëve, fakt i cili tregon se kompania ka në plan të forcojë prezencën e saj në SHBA. Në përshkrimin e punës tregohet se “kandidatët do të jenë përgjegjës për shitjen dhe reklamimin e të gjithë produkteve të Pico në tregun e SHBA.”
Pico ka ende shumë punë për të bërë, dhe ByteDance ka mundësitë për t’i dhënë kësaj kompanie një shtysë të nevojshme për të konkurar me prodhuesit e tjerë të VR Headsets si Meta, HTC, Valve dhe PlayStation në SHBA. Headset-i flagship i Pico, Pico Neo 3 Link, u lançua në Evropë gjatë muajit maj për €449.
