Whatsapp, i cili sot numëron mbi 2 bilion përdorues në të gjithë botën, është gati të lançojë katër shërbime të reja në javët që vijnë. Sipas raporteve paraprake të gjitha janë të konfirmuara edhe pse nga kompania nuk ka një komunikim zyrtar. Nga ruajtja e privatësisë e deri tek mënyra si shihni links, këto janë ndryshimet që do të vijnë në Whatsapp:
Dark Mode
Tashmë e gatshme për përdoruesit beta, një dark mode është gati të kalojë në Android dhe iOS për pak ditë. Ky shërbim ju jep mundësinë që të kurseni sadopak baterinë dhe mbi të gjitha të harxhoni më shumë kohë në app gjatë natës, pasi tani nuk do të shqetësoheni nga ndriçimi i fortë i sfondit.
Reklamat
Një vit më parë të gjithë u shqetësuam kur morëm vesh se bisedat tona në Whatsapp do të shoqëroheshin me reklama, që për hir të vërtetës nuk i pëlqejnë askujt. Facebook reagoi menjëherë duke anulluar idetë të cilat këtë vit do të rikthehen, fatmiresisht jo në chat. Pas pak javësh, prisni që ndërsa kaloni në Whatsapp Stories të shihni edhe reklama, të ngjashme me ato në Instagram.
Mesazhet vetë-shkatërruese
Përmes këtij shërbimi ju mund të zgjidhni kohën (ditë, javë, muaj) kur mesazhi juaj do të fshihet nga smartphone i personit që ja dërgoni, përfshirë këtu fotot, audiot dhe dokumentat. Ndonëse ende nuk e kemi në asnjë version beta, ky shërbim mendohet të jetë gati dhe me shumë mundësi do të lançohet brenda këtij viti.
Qëllimi i tij mund të jetë edhe një mënyrë e mirë për të eliminuar materialet e rëndësishme në rast vjedhje të një smartphone ose për të ndihmuar miqtë që të kenë një memorie sa më të pastër. Fundja, kujt i duhet një foto e jona pas disa muajsh!
Browser në app
I ngjashëm me Facebook ky shërbim, i bazuar në Chrome, synon krijimin e një browseri brenda aplikacionit për të mos u larguar nga ai edhe gjatë momentit që ju klikoni një link. Whatsapp do të njoftojë gjithashtu përdoruesin në raste të një adrese të dyshimtë.
