Mënyra si interneti qëndron falas ka të bëje me reklamat. Por me kalimin e kohës marketingu është bërë agresiv, aq sa monitoron çdo lëvizje tonën, çdo kërkim e klikim vetëm për të krijuar një profil sa më të detajuar për t’ia shitur atë më pas ofruesit më të lartë. E nuk po flasim për gjigandë si Facebook e Amazon që ndjekin gjithçka bën edhe në faqe që nuk kanë aspak lidhje me to, por edhe shumë gjurmues të fshehtë për të cilët as që ia ke idenë. Vetëm tani teksa je duke e lexuar këtë artikull mund të kesh mbi 10 monitorues për të cilët as ti as ne nuk jemi dijeni.
Dhe me monitorim nuk e kemi fjalën vetëm për pëlqimet e shijet e muzikës, por edhe kërkimet e tua për aspekte shëndetësore dhe blerjet më intime. Informacion të cilin nuk ke pse e ndan me askënd pa pëlqimin tënd apo të paktën një shpërblim përtej internetit falas.
Për fat të mirë ekzistojnë mënyra si të luftosh mbrapsht, nëpërmjet ekstensioneve bllokuese të cilat nuk do të të garantojnë privatësinë absolute por të minimumi do të të lajmërojnë për çfarë ndodh prapa faqes që je duke u futur, e kështu të zgjedhësh nëse ia vlen më apo jo të futesh aty. E në fund, me këtë aktivitet të bllokuar browseri do të punojë më lehtë.
HTTPS Everywhere
Kur futesh në një faqe duhet të kontrollosh lart majtas URL-së së faqes nëse simboli i kyçit është i hapur apo i mbyllur. Nëse është i mbyllur, ajo faqe është e enkriptuar me HTTPS. Kjo është një garanci që faqja nuk është modifikuar nga një person i tretë. Gjithçka që do i furnizosh asaj faqeje do të mbetet mes teje dhe web-it. HTTPS Everywhere është një extension që hap automatikisht faqet me këtë protokoll nëse është i dispuneshëm, ose bllokon ato që nuk e kanë atë.
Privacy Badger
Ky extension ndalon gjithë gjurmuesit e padukshëm në një faqe. Ai studion aktivitetin e tyre dhe kupton cilat të ndjekin nga webi në web, e nuk i lejon që të karikohen në browser. Privacy Badger gjithashtu mësohet edhe me ty, ndaj bëhet sa vjen edhe më i mirë.
uBlock Origin
Ky është një bllokues reklamash i cili ndalon reklamat që të shfaqen teksa je duke lundruar në net, por bllokon edhe kodin gjurmues që vjen me to. uBloc Origin është i lehtë në përdorim dhe goxha i lehtë për t’u përdorur. Nëse një faqe që të duhet me patjetër nuk të lejon të futesh pa lejuar reklamat mundesh edhe t’ia pezullosh aktivitetin e ta riaktivizosh më pas.
PixelBlock & ClearURLs
Nëse besoje se emailet e tua janë të sigurta, duhet të dish që një pjesë e mirë prej tyre vijnë me disa pika të vogla quajtur pixels, të cilat njoftojnë dërguesin nëse e ke hapur emailin. PixelBlock ndez një dritë të vogël të kuqe sa herë që i ndjen këto tregues dhe të vë në dijeni. Por ka të tjerë që shkojnë edhe më larg duke gjurmuar nëse e ke klikuar linkun që të kanë dërguar apo jo, ClearURLs qëndron në emailin tënd dhe e pastron atë nga këta sinjalizues.
Firefox Multi-Account Containers
Ky është një shërbim i ofruar nga Firefox, i cili është i ndërtuar brenda browserit për të mundësuar izolimin skedarët e tu të navigimit. Pra ti mundesh të bësh aktivitet për punë dhe personal në mëyrë të ndarë pa pasur nevojë për disa browsera njëkohësisht. Multi-Account Containers ruan edhe përcaktimet e tua të privatësisë për secilën nga navigimet.
